Референдум за отповикување градоначалник и комунална полиција – нови предлози за поголема отчетност на локалната власт
Предлог-законот за изменување и дополнување на Законот за локалната самоуправа влезе во второ читање пред Комисијата за локална самоуправа во Собранието, со фокус на зголемување на транспарентноста, отчетноста и дигитализацијата во работењето на општините. Клучна новина е воведувањето можност за референдумско отповикување на градоначалници, како и формирање на т.н. комунална полиција на општинско ниво.
Клучна новина е воведувањето можност за референдумско отповикување на градоначалници, како и формирање на т.н. комунална полиција на општинско ниво.
Министерот за локална самоуправа, Златко Перински, на седницата на Комисијата одржана на 14 мај истакна дека измените се резултат на инклузивен процес во кој учествувале домашни и меѓународни експерти, при што како основа е земен извештајот на Венецијанската комисија од 2019 година за отповикување на локални избрани претставници.
„Градоначалниците се избираат директно од граѓаните, но актуелниот закон не предвидува начин за проверка на нивната доверба пред истекот на мандатот. Со новите измени се воспоставува механизам за нивна отчетност, што е еден од клучните предизвици на постоечкото законско решение,“ истакна Перински.
Со измените се предлага и воспоставување на комунална полиција, која ќе биде надлежна за контрола на комуналниот ред, хигиената и примената на локалните одлуки. Ова тело ќе делува на ниво на општините и ќе придонесе за поефикасно решавање на секојдневните проблеми на граѓаните.
Исто така, предвидени се и мерки за зголемување на транспарентноста и дигитализација на општинските услуги, што треба да резултира со поефикасна и поотворена локална администрација, како и намалување на ризиците од корупција.
На Предлог-законот се поднесени вкупно 17 амандмани од страна на овластени предлагачи, а тој е ставен како единствена точка и на дневниот ред на Законодавно-правната комисија.
Очекувањата се дека со овие измени ќе се зајакне локалната демократија и ќе се обезбеди поголема одговорност на избраните претставници пред граѓаните кои ги гласале.
