Фотографите во потрага по скриеното културно наследство – До 400 евра за најдобрата фотографија: „Вики ги сака спомениците“

„Вики ги сака спомениците“ – фотографите во потрага по скриеното културно наследство

Еден фотоапарат, добра приказна и македонското културно наследство се доволни за да се стане дел од светската фотографска мапа. Од 1 до 30 септември 2026 година, фотографите повторно ќе имаат можност да го овековечат културното богатство на Македонија во рамки на фотографскиот натпревар „Вики ги сака спомениците“ (Wiki Loves Monuments).

Наместо културното наследство да остане само во архивите и туристичките брошури, организаторите ги повикуваат граѓаните да го погледнат од поинаков агол – преку објективот на фотоапаратот или мобилниот телефон. Целта е да се соберат што повеќе квалитетни фотографии од споменици, заштитени објекти и други места од културно значење, кои потоа ќе бидат достапни на Wikimedia Commons под слободна лиценца.

Натпреварот во Македонија го организира здружението „Викимедија МКД“, а македонската Википедија досега имала изданија во 2014, 2015 и 2021 година. На меѓународно ниво, „Вики ги сака спомениците“ започнал во 2010 година во Холандија, за подоцна да прерасне во глобален фотографски натпревар.

Оваа година натпреварот трае точно еден месец – од 1 септември во 00:00 часот до 30 септември во 23:59 часот, по македонско време.

А мотивот за учество не е само љубовта кон фотографијата. За најдобрите учесници се обезбедени и награди. Авторот на најдобро оценетата фотографија ќе добие ваучер во денарска противвредност од 400 евра, за второто место следуваат 200 евра, а за третото 100 евра. Предвидена е и посебна награда од 300 евра за фотографот кој ќе документира најмногу различни објекти од посебниот список.

За учество, потребно е фотографиите да бидат направени во Македонија и да имаат документарен карактер. Откако ќе бидат направени, тие треба да се подигнат на Wikimedia Commons под слободна лиценца, преку предвидениот образец, а учесниците треба да се пријават и преку образецот за учество.

Зад фотографијата, сепак, стои нешто многу поголемо – обид да се зачува визуелна трага за местата што сведочат за македонската историја, култура и архитектура. Еден стар мост, црква, археолошки локалитет, споменик или традиционална градба можеби за некого е само дел од секојдневието, но со една фотографија може да стане дел од светската слободна дигитална архива.

Правилата за учество, списокот на објекти и начинот на пријавување се достапни на македонската Википедија.