МАРКО ВИДЕНОВИЌ И ТРИО „МЕВЛЕМ“ СО НЕЗАБОРАВЕН НАСТАП НА „БИТ ФЕСТ“

Синоќа, на платото пред Офицерски дом во Битола, во рамките на Битолското културно лето „БИТ ФЕСТ“, публиката имаше можност да доживее едно вистинско уметничко патување низ љубовта, болката и надежта преку уникатниот проект „Мевлем“.

Авторската музика и поезија на композиторот и поет Марко Виденовиќ, во совршена хармонија со интерпретациите на музичарите Памела Велкова (виолина), Верица Ајтовска (виола), Енис Аљи (виолончело) и самиот Виденовиќ на пијано и вокал, оставија силен емоционален впечаток кај присутните.

Проектот „Мевлем“, кој досега беше претставен во повеќе градови низ регионот, и синоќа ја потврди својата уметничка автентичност и длабока емотивна сила. Композициите специјално создадени за овој проект, претставија иновативен пристап кон камерната музика и современата поезија, во кои секој тон зборуваше, а секој стих се чувствуваше.

Концертот не беше само музички настан – беше вистинска уметничка исповед. Публиката со тивки емоции, некоја скриена солза и долги аплаузи реагираше на длабочината и искреноста на изведбите. Како што самиот автор Виденовиќ рече:

„Целта никогаш не беше само концерт, туку создавање простор за дијалог, за разбирање, за споделување лични приказни. А синоќа, тоа навистина се случи.“

Настанот заврши со долги стоечки овации и атмосфера што ќе се памети уште долго – како сведоштво за моќта – убавината на уметноста да допре длабоко во човековата душа.

Културното лето во Битола има континуитет повеќе од 48 години. Од некогашните Хераклејски вечери, во 2006 година, организацијата на културното лето ја презема Општина Битола, а овој настан се трансформира во препознатливиот битолски фестивал — БИТ ФЕСТ, кој во текот на летниот период, значително го збогатува културниот живот во градот.