Хирошима одбележа 81 година од атомското бомбардирање – повик за свет без нуклеарно оружје
Со едноминутно молчење, звукот на Ѕвоното на мирот и пораки за глобално нуклеарно разоружување, Хирошима денеска ја одбележа 81-годишнината од атомското бомбардирање.
На комеморацијата во Меморијалниот парк на мирот присуствуваа околу 50.000 луѓе, меѓу кои претставници на околу 120 држави и региони. Во 8:15 часот по локално време – точниот момент кога на 6 август 1945 година американскиот бомбардер Б-29 ја фрлил атомската бомба врз градот – присутните оддадоа почит со едноминутно молчење.
Градоначалникот на Хирошима, Казуми Мацуи, во својата годишна Декларација за мир ги повика светските лидери да престанат да го оправдуваат поседувањето нуклеарно оружје како средство за одвраќање и да преземат конкретни чекори кон негово целосно укинување.
„Политичари на светот, граѓанското општество бара итно укинување на нуклеарното оружје. Уште колку долго имате намера да нè разочарувате?“, порача Мацуи.
Тој предупреди дека прифаќањето на силата како средство за остварување политички и економски цели може да доведе до нов круг насилство и одмазда, нагласувајќи дека нуклеарното одвраќање не смее да биде трајна безбедносна политика.
Мацуи упати повик и до младите генерации да ги зачуваат сведоштвата на преживеаните од атомските напади – познати како хибакуша – и да продолжат да се залагаат за свет без нуклеарно оружје. Денес живи се околу 91.000 преживеани, чија просечна возраст е над 86 години.
Во меморијалниот регистар на жртвите годинава се впишани уште 4.393 имиња, со што вкупниот број достигна 353.639.
Јапонската премиерка Санае Такаичи, која првпат присуствуваше на церемонијата како премиер, изјави дека Јапонија ќе продолжи да се залага нуклеарното оружје никогаш повеќе да не биде употребено. Таа ги повтори трите ненуклеарни принципи на земјата – да не произведува, да не поседува и да не дозволува внесување нуклеарно оружје на својата територија.
Во писмена порака, генералниот секретар на Обединетите нации, Антонио Гутереш, предупреди дека меѓународните механизми кои со децении спречуваа нуклеарна катастрофа се под сè поголем притисок.
„Државите мора да изберат дијалог наместо поделби, соработка наместо конфронтација и заедничка безбедност наместо тесни национални интереси“, порача Гутереш.
На 6 август 1945 година американскиот бомбардер „Енола Геј“ ја фрли ураниумската бомба „Малото момче“ врз Хирошима. До крајот на истата година, според проценките, од експлозијата, повредите и последиците од радијацијата починале околу 140.000 луѓе.
Само три дена подоцна, втора атомска бомба беше фрлена врз Нагасаки, каде што животот го загубија околу 70.000 луѓе. На 15 август 1945 година Јапонија ја објави капитулацијата, со што заврши Втората светска војна.
