(видео) Филип Јездиќ ја објави својата деветта соло композиција

Музичарот Филип Јездиќ ја претстави својата нова авторска композиција, деветта во неговиот соло музички проект.

Музиката, текстот и аранжманот на новата композиција се дело на Филип Јездиќ, кој ги свири и електричните и акустичната гитара, флејтата, бас гитарата, клавијатурите и тапаните. Вокалите ги изведуваат Серафим и Наташа Седлоска, а во музичкото видео настапува Лора Штарго.

За снимањето, миксот и мастерингот се погрижи Томе Темелкоски. Идејата за видеото ја осмислиле Темелкоски, Јосиф Трајкоски и Филип Јездиќ, додека режијата, камерата и монтажата се на Јосиф Трајкоски.

Видеото завршува со порака од авторот, посветена на внатрешниот конфликт меѓу гордоста и чувството на инфериорност. Јездиќ го претставува човекот како „растегната точка“ меѓу овие две состојби, посочувајќи дека кога гордоста е поттикната од лични достигнувања, но истовремено е придружена со чувство на инфериорност, во човекот се создава внатрешна борба.

„Во внатрешниот конфликт, во состојба на раздразливост, борбата треба да се води против двете страни за да се зачува функционалноста на здравата психа“, порачува авторот.

Со деветтата соло композиција, Јездиќ не нуди само ново музичко дело, туку и размислување за човечката природа и противречностите што ги носиме во себе.