110.000 прекршоци за 24 часа – ‘Безбеден град’ ја откри вистинската сообраќајна слика
Системот за надзор „Безбеден град“, кој од вчера официјално работи во Скопје, во првите 24 часа регистрирал околу 110.000 сообраќајни прекршоци, покажувајќи колку е сериозен проблемот со небезбедното возење во главниот град. Од нив, околу 1.000 возила се движеле без валидна регистрација, а 5.000 поминале на црвено светло.
Податоците покажуваат и загрижувачки факт: во 90 проценти од сите прекршоци е констатирано движење со поголема брзина од дозволената, што системот го позиционира како клучна алатка за зголемување на безбедноста во сообраќајот.
Министерот за внатрешни работи Панче Тошковски на прес-конференција истакна дека воведувањето на системот е со цел да се намали бројот на трагични исходи. Минатата година во сообраќајни несреќи загинале 142 лица, бројка која, како што рече, „не е само статистика – тоа се човечки животи и семејства кои страдаат“.
Тошковски нагласи дека во дел од прекршоците биле забележани технички пропусти, односно записниците не пристигнале до вистинските сопственици на возилата. Овој период е дефиниран како тест-фаза, а сите утврдени грешки ќе бидат надминати.
Согласно законските исклучоци, возилата на Брза помош, како и оние на МВР, АРМ и одредени сервисни служби, нема да бидат санкционирани кога брзината е зголемена поради службена потреба. Сепак, министерот истакна дека „службените црвени таблички не значат имунитет“, додавајќи дека тројца возачи на министри веќе биле казнети за непридржување кон правилата.
Во однос на странските регистрации, Тошковски појасни дека возилата не може да бидат спречени да ја напуштат државата, но нема да им биде дозволено повторно да влезат доколку претходно не ги подмират казните.
Во моментот се врши проверка на сите локации каде се поставени камерите, а следен чекор ќе биде комплетна ревизија на сообраќајните знаци низ Македонија, за да се обезбеди доследна и јасна сигнализација.
