УКЛО со акција во пресрет на 8 Март: „Еманципација во акција“
Во пресрет на Меѓународниот ден на жената – 8 Март, Универзитетот „Св. Климент Охридски“ – Битола (УКЛО) реализира значајна иницијатива, спојувајќи практична работа со симболиката на женскиот придонес во општеството. Акцијата, која се фокусираше на уредување на јавниот простор пред Студентскиот информативен центар (SIC-Uklo), обедини вработени од Ректоратот на УКЛО и студенти, испраќајќи силна порака за еднаквост и почитување на правата на жените.
Ректорот на УКЛО, проф. д-р Игор Неделковски, ја истакна инспиративната улога на жените во општеството, нагласувајќи дека создавањето на уреден и организиран простор симболизира напредок и еднакви можности за сите.
Претседателот на Универзитетското студентско собрание (УСС УКЛО), Димитар Атанасовски, оваа иницијатива ја оцени како важен чекор кон подобрување на студентскиот стандард, додека проректорката за студентски работи, проф. д-р Јасмина Буневска Талевска, и академската раководителка на УКЛО КОЛОРС, проф. д-р Рената Петревска Нечкоска, ја потенцираа важноста на колаборативните простори за развојот на академската заедница.
Со мотото „Еманципација во акција“, УКЛО ја испраќа пораката дека секој организиран и уреден простор е одраз на напредокот и борбата за еднаквост. Просторот пред Студентскиот информативен центар е планиран да прерасне во симбол на улогата на жените во академската и професионалната средина.
Универзитетот со оваа иницијатива ја нагласува и активната улога на високото образование во создавање инклузивни и позитивни средини, кои не само што се функционални, туку носат и силна порака за социјална одговорност и еднаквост.
