Од полноќ, односно од 3 ноември, возачите во Македонија ќе плаќаат повисоки цени за бензините и дизелот. Регулаторната комисија за енергетика (РКЕ) донесе одлука за зголемување на малопродажните цени на нафтените деривати.

Според новата одлука, бензините ЕУРОСУПЕР БС-95 и ЕУРОСУПЕР БС-98 поскапуваат за два денари по литар, додека цената на дизелот се зголемува за еден денар.

Со измените, максималните малопродажни цени ќе изнесуваат:

• ЕУРОСУПЕР БС-95 – 93 денари за литар;
• ЕУРОСУПЕР БС-98 – 95 денари за литар;
• ЕУРОДИЗЕЛ – 100 денари за литар.

Цената на екстралесното масло за домаќинство останува непроменета и ќе изнесува 110 денари за литар. Мазутот, пак, поскапува за 1,30 денари по килограм, со што новата цена ќе достигне 55,573 денари.

Од РКЕ информираат дека при утврдувањето на новите цени биле земени предвид движењата на референтните цени на нафтените деривати на светските пазари, како и промените на курсот на денарот во однос на американскиот долар.

Во пресметката биле вклучени и владините мерки за намален ДДВ за дизелот и пониски акцизи за бензините и дизел-горивото.

Просечното зголемување на малопродажните цени на нафтените деривати изнесува 1,55 отсто.

Одлуката на РКЕ ги утврдува највисоките малопродажни цени, што значи дека бензинските пумпи имаат можност да ги продаваат горивата и по пониски цени.