Културно-спортско лето во Кривогаштани: спорт, музика, театар и традиција
Општина Кривогаштани и годинава организира Културно-спортско лето, манифестација која во текот на месецот ќе понуди спортски, културни и забавни содржини за жителите и посетителите.
Програмата започнува со турнир во мал фудбал, кој ќе ги собере љубителите на спортот и ќе понуди натпревари и дружење.
Во рамките на манифестацијата е предвиден и концертот на отворено „Врбјанска Чука“, организиран од Центарот за истражување на предисторијата во соработка со Општина Кривогаштани. Концертот ќе се одржи на самиот археолошки локалитет, со музичка програма под отворено небо.
Театарската програма ќе ја збогати претставата „Девојките на Марко“, реализирана во соработка со Народниот театар „Војдан Чернодрински“ од Прилеп.
Љубителите на баскетот ќе имаат можност да бидат дел од меморијалниот турнир во баскет, во организација на здружението „Урбано Гнездо Кривогаштани“.
Дел од програмата е посветен и на земјоделството и локалната традиција. Фестивалот на пиперката, организиран во соработка со ЛАГ „Агро Лидер“, ќе ја промовира пиперката како еден од значајните земјоделски производи во овој регион, но и локалните производители и традицијата поврзана со нејзиното производство.
Манифестацијата ќе заврши со „Бела ноќ“, во организација на „Урбано Гнездо Кривогаштани“, со поддршка од Општина Кривогаштани. Предвидена е вечерна програма со музика, забава и дружење.
Од Општина Кривогаштани најавуваат дека со програмата сакаат да понудат содржини што ќе ги обединат спортот, културата, традицијата и забавата, со активности наменети за различни генерации.
