КУД „Илинден“Демир Хисар со Прво место на фолклорниот фестивал „Илинденски денови“
По повеќе од дваесет години пауза, Културно-уметничкото друштво „Илинден“ од Демир Хисар направи триумфално враќање на најреномираниот фолклорен фестивал во земјава – „Илинденски денови“, чиј 55-ти јубилеен фестивал се одржа во Битола.
КУД „Илинден“ не само што го освои срцето на публиката, туку и официјално го доби Првото место, со што уште еднаш се запиша во врвот на македонската фолклорна сцена.
Настапот на главната сцена пред Офицерскиот дом беше вистински спектакл. Друштвото се претстави со сценската адаптација „Горноселски велигденски собор“, која маестрално ги спои музиката, танцот и обичаите од регионот. Во изведбата беа вклучени традиционалните ора „Повраќано“, „Старо зарамечко“ и „Циганчица“, како и вокалната игра „Зет и невеста“, која ја долови велигденската атмосфера на македонското село.
Покрај настапот на главната сцена, КУД „Илинден“ беше присутен и на програмата „Ехо од Дамарите“ на плоштадот „Магнолија“, каде што членовите Ангел Петковски и Мартин Дојчиновски ја изведоа песната „Девојче бело црвено“, со што уште еднаш се потврди богатството на традицијата што ја негуваат.
Овој успех не само што го израдува Демир Хисар, туку и покажа дека љубовта кон традицијата, упорноста и креативноста се клучот за враќање и доминација на фолклорната сцена.
