Има ли иднина за Преспанското Езеро? – Рамсар мисија во Македонија

Преспанското езеро, едно од најзначајните природни богатства на Македонија, се соочува со еколошка катастрофа од невидени размери. Нивото на водата продолжува да паѓа, а секоја година исчезнуваат огромни количини вода. Бреговите на езерото се покриени со кал и тиња, а некогашните плажи сега се заменети со густи трски. За жителите на регионот и за сите оние што зависат од него, прашањето за опстанокот на Преспанското езеро станува се повеќе неизвесно.

„Нивото на водата е шест метри под нормалниот водостој. Состојбата на терен е загрижувачка, а брзото повлекување на водата се забележува буквално од ден во ден“, велат жителите на Преспа. Ова не е само еколошки проблем, туку и економски, бидејќи туризмот, кој некогаш беше клучна индустрија за регионот, се соочува со сериозен пад.

Преспа, сместена меѓу два национални паркови — Галичица и Пелистер — се сметаше за природен бисер со огромен туристички потенцијал. Но, со секое ново лето, туризмот во овој регион пропаѓа исто толку брзо како и самото езеро. И додека населението се жали на намалениот број на туристи и рибарите забележуваат исчезнување на мрестилишта, политичарите продолжуваат да ветуваат дека ќе се најдат решенија.

Mинистер за животна средина и просторно планирање, Изет Меџити, денеска беше домаќин на советодавната мисија Рамсар, предводена од Флоре Лафаје, која престојува во нашата земја за да даде стручни совети и препораки како да се третира и да се стопанисува со Преспанското Езеро. Езерото од 1996 година е ставено на листата на заштитени подрачја, а намалувањето на водостојот на Преспанското Езеро претставува сериозен проблем.

„Преспанското езеро има поддршка од ЕУ, УНДП и ГЕФ, но потребни се поголеми инвестиции и заеднички напори за да се постигне успех“, изјави Флоре Лафаје од Рамсарската конвенција. Мисијата ќе посети делови од Преспанското Езеро во Македонија, Албанија и Грција, за да анализира зошто се случува овој феномен. По обиколката на терен, мисијата ќе предложи конкретни мерки кои ќе бидат вклучени во поширока регионална стратегија за заштита на водите и биодиверзитетот.