Црногорски модел на работа – Еднаш месечно петокот станува викенд!
Во Црна Гора е поднесен предлог-закон што би можел значително да го промени начинот на организирање на работното време. Пратеници од Демократска Црна Гора предлагаат вработените да добијат право на продолжен викенд еднаш месечно, преку слободен петок пред последниот викенд во месецот.
Според предлогот, работниците би добивале дополнителни 24 часа одмор кои би се надоврзувале на редовниот викенд, создавајќи тридневен непрекинат одмор. Предлагачите сметаат дека ваквата мерка ќе придонесе за подобро физичко и ментално здравје на вработените, намалување на стресот и поголема рамнотежа помеѓу професионалниот и приватниот живот.
Од Демократска Црна Гора наведуваат дека современите трендови во организацијата на трудот сè повеќе се насочени кон подобрување на условите за работа и зголемување на задоволството кај вработените, што на долг рок може да донесе и поголема продуктивност.
Покрај придобивките за работниците, се очекува мерката позитивно да влијае и врз домашниот туризам, угостителството и локалната економија, бидејќи граѓаните би имале повеќе време за патувања, семејни активности и одмор.
Предлогот веќе е доставен во собраниска процедура и ќе биде предмет на разгледување од Владата, синдикатите и работодавачите. Додека трае дебатата, на социјалните мрежи не изостануваат ниту шегите дека Црна Гора можеби ќе стане првата земја во регионот каде што продолжениот викенд ќе биде загарантиран со закон, потврдувајќи ја популарната балканска шега дека „ако може денес да не се работи, зошто да се чека утре“.
Доколку предлогот добие поддршка, црногорските работници би можеле да добијат уште една причина повеќе со нетрпение да го очекуваат крајот на месецот
