Сите заинтересирани за органско производство на зеленчук ќе имаат можност да ги направат првите чекори кон сопствена биоградина

Здружението за образование, култура и уметност ЗОКУМ – Прилеп организира бесплатен онлајн час по биоградинарство, на кој учесниците ќе се запознаат со основните принципи и практичните методи за одгледување здрава храна на природен начин.

Часот ќе се одржи во четврток, на 5 ноември, со почеток во 19 часот, преку платформата ЗУМ (ZOOM). Бидејќи предавањето е онлајн, можност да се вклучат ќе имаат сите заинтересирани, без разлика каде живеат.

Предавањето е наменето пред сè за оние кои сакаат да произведуваат сопствен зеленчук за домашни потреби, но немаат доволно знаење и искуство. Истовремено, корисни информации ќе добијат и искусните земјоделци кои сакаат конвенционалните методи на производство да ги заменат со поприродни пристапи.

Како до вкусен зеленчук без хемиски средства и вештачки ѓубрива? Ова е едно од прашањата на кои ќе се посвети внимание за време на часот. Присутните ќе се запознаат со производството на биозеленчук, подготовката на природни средства за заштита и прихрана на растенијата, како и со агротехничките методи што се применуваат во биоградинарството.

Предавач е Филип Димкоски, дипломиран земјоделски инженер во областа на градинарството и цвеќарството, кој ќе ги запознае учесниците со основите на оваа практика и можностите за нејзина примена.

Покрај едукативниот дел, во рамките на предавањето ќе бидат претставени и можностите и деталите за онлајн курсот по биоградинарство, со што ќе биде отворен и повикот за негово следење.

Сите заинтересирани можат да се приклучат преку следниот линк:

Приклучи се на бесплатниот онлајн час по биоградинарство

Со оваа иницијатива, ЗОКУМ – Прилеп отвора можност за стекнување нови знаења за еколошко производство на храна и поттикнува интерес за одгледување сопствен зеленчук на природен и одржлив начин.