Нова медицинска опрема за три одделенија во прилепската болница – донација од Project HOPE
Прилепската болница доби осум нови инфузиони пумпи
ЈЗУ Општа болница со проширена дејност „Борка Талески“ – Прилеп доби осум нови инфузиони пумпи, наменети за одделенијата за детски болести, анестезиологија и гинекологија со акушерство. Новата медицинска опрема треба да придонесе за поголема прецизност и безбедност при спроведувањето на инфузионата терапија и за унапредување на грижата за пациентите.
Донацијата е обезбедена преку хуманитарната организација Project HOPE, со ангажман на директорот на болницата, д-р Кире Јоноски, и д-р Габриела Тавчиоска.
Во рамки на активноста, стручен тим на Project HOPE спровел и обука за медицинскиот персонал за правилно и безбедно ракување со новите апарати. Обуката е значаен дел од воведувањето на опремата во употреба, со цел нејзина соодветна примена во секојдневната работа со пациентите.
Инфузионите пумпи овозможуваат контролирано и прецизно внесување течности и лекови, што е особено важно при третманот на децата и другите пациенти на кои им е потребна внимателно дозирана терапија.
Од прилепската болница изразија благодарност до Project HOPE за донацијата и поддршката во подобрувањето на условите за работа и здравствена заштита.
Со оваа донација, болницата добива дополнителна медицинска опрема за три значајни одделенија, а вложувањето во современи апарати и едукацијата на здравствениот персонал остануваат важни фактори за унапредување на квалитетот на здравствените услуги во Прилеп.
