Отворен Центар за услуги во Прилеп – граѓаните ќе имаат полесен пристап до електронските услуги

Во Прилеп е отворен нов Центар за услуги, кој има за цел да им овозможи на граѓаните полесен и побрз пристап до административните и електронските услуги на институциите.

Центарот беше посетен од министерот за дигитална трансформација Стефан Андоновски, заедно со градоначалникот на Општина Прилеп, Дејан Проданоски. Новиот сервис е резултат на соработката меѓу Министерството за дигитална трансформација и локалната самоуправа.

Андоновски истакна дека со отворањето на Центарот е исполнето ветувањето дадено при неговата претходна посета на Прилеп – граѓаните да добијат место каде што ќе можат да добијат помош и насоки за користење на услугите што ги нудат институциите.

Во Центарот за услуги, жителите на Прилеп и околината ќе можат да добијат информации, стручна поддршка и помош при користењето на електронските услуги преку Националниот портал за услуги uslugi.gov.mk.

„Целта е граѓаните да немаат потреба да одат од една до друга институција, туку услугите да ги добиваат побрзо, полесно и поблиску до местото каде што живеат“, порача Андоновски.

Од Министерството за дигитална трансформација најавуваат дека процесот на отворање нови Центри за услуги ќе продолжи и во други градови низ државата, со намера електронските и административните услуги да станат подостапни за граѓаните и компаниите.

Со новиот Центар во Прилеп, институциите продолжуваат со развој на систем во кој дигиталните услуги се поблиски и полесни за користење.