Лина Ѓорческа испиша историја – прва Македонка во главниот ждреб на Вимблдон
Најдобрата македонска тенисерка Лина Ѓорческа направи историски успех, откако преку квалификациите обезбеди пласман во главниот ждреб на најпрестижниот тениски турнир во светот – Вимблдон.
Во последното квалификациско коло, Ѓорческа убедливо ја совлада Италијанката Луција Бронзети со 2:0 во сетови (6-1, 6-2), во меч што траеше еден час и 15 минути. Со оваа победа, таа стана првата македонска тенисерка што успеала да се пласира во главната фаза на Вимблдон.
Македонката одигра одличен натпревар и беше подобра во сите сегменти од играта. Според официјалната статистика, Ѓорческа освои 20 директни поени, наспроти 10 на Бронзети, а имаше и помал број неизнудени грешки.
Клучен фактор за победата беше сигурната игра на сервис. Ѓорческа освои 79 проценти од поените на прв сервис и реализираше три од седумте брејк-шанси што ги создаде. Од друга страна, и покрај 14 можности за брејк, Италијанката успеа да искористи само една.
До историскиот пласман, Ѓорческа стигна по три победи во квалификациите, при што во претходното коло направи пресврт против португалската тенисерка и славеше со 5-7, 6-2 и 6-1.
Со овој резултат, македонскиот тенис добива свој претставник во главниот ждреб на еден од четирите Грен слем турнири, а љубителите на спортот во Македонија со нетрпение го очекуваат настапот на Ѓорческа на тревата во Лондон.
