40 милиони евра за нови вработувања – фокусот е на младите до 29 години
Со новиот Оперативен план за вработување за 2025 година, Владата на Македонија најави вложување од 40 милиони евра за отворање на повеќе од 16.000 нови работни места, при што главниот фокус се става на младите лица до 29 години. Планот вклучува низа мерки за поддршка на младинското вработување, самовработување, обуки и практикантство.
Мерките опфатени со планот предвидуваат финансиска поддршка за млади кои сакаат да отворат сопствен бизнис – со неповратни средства од 10.000 евра по лице. Дополнително, постои можност за здружување на две лица кои ќе основаат заеднички бизнис, со финансиска поддршка која се движи од 14.000 до 20.000 евра, зависно од бројот на содружници. Целта е да се поттикне младинското претприемништво и да се создадат услови за одржливи мали и средни бизниси.
Оперативниот план предвидува и младински додаток од 50 евра месечно за млади до 23 години кои ќе се вработат во производствени дејности, како и поддршка за практиканство и обуки кои ќе помогнат во стекнување на вештини и олеснување на пристапот до пазарот на трудот.
Работодавачите, пак, ќе имаат можност да добијат субвенции во висина до 250.000 денари за секое вработено младо лице до 29 години, како стимул да ангажираат млади кадри и да придонесат за намалување на невработеноста во оваа возрасна група.
Покрај мерките насочени кон младите, планот вклучува и вработување на 400 пожарникари за потребите на општините, 600 лица ангажирани за јавни и општински проекти, како и поддршка за лица со атипичен развој. Новина е што сите мерки се наменети исклучиво за оние кои се евидентирани како активни баратели на работа во Центрите за вработување.
Со зголемениот буџет за 7,5 милиони евра во однос на минатата година, Владата очекува значително намалување на невработеноста и задржување на младите во државата преку создавање конкретни можности за нивна професионална реализација.
Првите јавни повици се очекува да бидат објавени наскоро, а останатите ќе се спроведуваат етапно според однапред утврден план.
