„НЕ БРЗАЈ. НЕКОЈ ТЕ ЧЕКА ДОМА!“ – Во Прилеп се одржа настан посветен на сеќавањето на жртвите во сообраќајните незгоди

Денеска, 20 ноември 2026 година, на плоштадот „Методија Андонов – Ченто“ во Прилеп се одржа централниот настан во рамки на кампањата „НЕ БРЗАЈ. НЕКОЈ ТЕ ЧЕКА ДОМА!“, посветена на одбележувањето на Светскиот ден на сеќавање на жртвите во сообраќајните незгоди.

Иницијативата, организирана од Општинскиот совет за безбедност на сообраќајот на патиштата (ОСБСП) при Општина Прилеп, во соработка со основните училишта, има за цел да ја подигне јавната свест за последиците од сообраќајните незгоди и да ја нагласи личната одговорност на секој учесник во сообраќајот.

Кампањата, која се реализира од 15 до 22 ноември, испраќа силна порака дека зад секоја сообраќајна несреќа не стојат само статистички податоци, туку човечки животи, семејства и судбини засекогаш променети. Според податоците наведени во кампањата, во текот на 2025 година во Република Македонија животот го загубиле 132 лица.

Како симболичен потсетник за секој загубен живот, во рамки на иницијативата беа изработени точно 132 пораки, по една за секоја жртва. Преку нив се испраќа апел до сите возачи да бидат повнимателни и поодговорни, бидејќи секое невнимание, пребрзо возење или неодговорно однесување во сообраќајот може да има трагични последици.

Особено значаен дел од иницијативата е нејзината јасна порака до јавноста: зад секој волан седи човек чија одговорност не завршува со неговата безбедност, туку ги опфаќа и животите на сите останати учесници во сообраќајот.

Од ОСБСП упатуваат апел до возачите да ја намалат брзината, да не го користат мобилниот телефон додека возат, да го почитуваат задолжителното користење на безбедносниот појас и никогаш да не управуваат возило под дејство на алкохол.

Целта на оваа иницијатива е пораката да не остане само дел од еднодневен настан, туку да стане трајно потсетување дека сообраќајната безбедност е заедничка одговорност и дека зад секое безбедно пристигнување стои можност за уште една семејна прегратка.

Слични Објави