Македонски локални лидери во Брисел: Зајакнување на соработката со ЕУ и фокус на животната средина

Претставници на македонските општини, предводени од ЗЕЛС, учествуваа на состанокот на Заедничкиот консултативен комитет помеѓу Комитетот на региони на Европската Унија и Македонија, кој се одржа во Брисел, во седиштето на Европскиот комитет на региони – „Жак Делор“.

Како дел од делегацијата, македонски претставник имаше чест да ко-претседава со сесијата, при што активно учествуваше во дебатите што ги опфатија клучните предизвици и можности за локалните самоуправи во контекст на европската интеграција.

Темите на дискусија опфатија:

• напредокот на Македонија во процесот на пристапување кон ЕУ,
• унапредување на локалната меѓурегионална и прекугранична соработка,
• перспективите на локалните заедници во ЕУ контекст,
• справување со загадувањето и заштитата на животната средина.

Македонската делегација беше составена од Душица Перишиќ, директорка на ЗЕЛС, градоначалниците Тони Коњановски (Битола), Јован Тозиевски (Ресен), Ѓорѓе Божинов (Ново Село) и Жарко Ристески (Македонски Брод).

Во рамки на посетата, делегацијата беше примена и во Амбасадата на Македонија во ЕУ, на покана на амбасадорот Зулфи Исмаили, кој исто така се обрати на сесијата. Посетата беше искористена за одбележување на 80-годишнината од кодификацијата на македонскиот литературен јазик, соодветно одбележана во дипломатскиот дом во Брисел.

Настанот ја потврди заложбата на македонските општини за подлабока европска интеграција и зајакната улога на локалната самоуправа во процесот на евроинтеграции.