ЈЕНИ ЏАМИЈА- ОТВОРЕНА КАКО МУЗЕЈ НА ХРИСТИЈАНСКАТА И МУСЛИМАНСКАТА КУЛТУРА

Јени џамија, една од историските и културни знаменитости на Битола, по долги години реставрација и археолошки ископувања на 21.11.2024 година, повторно е отворена за посетители. Џамијата, која датира од 16. век, ќе биде дом на новиот Музеј на христијанската и муслиманската култура. Овој музеј ги комбинира историјата и културата на двете религиски наследства, кои со векови постоеле заедно во регионот.

Археолошките ископувања откриле остатоци од некогашната катедрална црква „Свети Ѓорѓи“, најголемата во Битола, како и христијанска некропола. Под реставрираниот екстериер на Џамијата се откриени делови од темелите на оваа црква, што ја прави оваа локација уште поинтересна и значајна. Реставрацијата на тремот, подот и екстериерот беше финансиски поддржана од Министерството за култура, а посетителите можат да видат делови од историските фази од 7. до 11. век.

Од Заводот и музејот во Битола, истакнуваат дека Џамијата нуди можност за увид во археолошкиот слој од различни периоди и култури. Овој музеј ќе стане место на заедничко спојување на христијанската и муслиманската традиција, како важен симбол на соживот и љубов.

Музејот ќе биде отворен секој работен ден, од 10 до 14 часот, и се очекува да придонесе за зголемување на туристичката понуда на Битола.