АРХАНГЕЛОВДЕН – ПРАЗНИК НА НЕБЕСКИТЕ ЗАШТИТНИЦИ: СЕ ВЕРУВА ДЕКА СЕКОЈ ЧОВЕК ИМА СВОЈ АНГЕЛ-ЧУВАР

На 21 ноември православните христијани го празнуваат Соборот на Светиот Архангел Михаил и останатите небесни сили. Празникот нè потсетува на верата, духовната заштита и ангелите кои, според христијанското предание, се Божји гласници и заштитници на луѓето.

Православните верници на 21 ноември го одбележуваат Архангеловден – Соборот на Светиот Архистратиг Михаил и сите останати небесни бестелесни сили. Овој голем христијански празник е посветен на ангелскиот свет, а во центарот на празнувањето е Свети Архангел Михаил, познат како предводник на небесната војска и заштитник на православната вера.

Во христијанското предание, ангелите се Божји гласници, духовни битија кои ја исполнуваат Божјата волја и им помагаат на луѓето. Тие не се само симбол на небесната убавина и чистота, туку и потсетник дека човекот треба да живее со вера, добрина и чиста совест.

СЕКОЈ ЧОВЕК ИМА СВОЈ АНГЕЛ-ЧУВАР

Едно од најсилните верувања поврзани со ангелскиот свет е дека секој христијанин има свој ангел-чувар, кој го следи и духовно го застапува.

„Секој народ си има свој ангел пазител, а освен тоа и секој христијанин има свој ангел пазител. Треба секогаш да се сеќаваме дека што и да правиме, јавно или тајно, го правиме тоа во присуство на својот ангел-чувар“, се вели во духовното поучение посветено на Свети Архангел Михаил.

Оваа порака нè повикува да размислиме за нашите постапки, зборови и мисли. Да бидеме подобри кон ближните, да не правиме зло дури и кога никој не нè гледа и да не забораваме дека вистинската вера се покажува преку делата.

КОЈ Е СВЕТИ АРХАНГЕЛ МИХАИЛ?

Името Михаил значи „Кој е како Бог?“. Во православната традиција тој е претставен како архистратиг – предводник на небесните сили, борец против злото и чувар на Божјата вистина.

На иконите најчесто е прикажан со меч или копје, како симбол на победата над злото и одбраната на верата.

Покрај Архангел Михаил, меѓу најпознатите небесни гласници е и Архангел Гаврил, кој во христијанското предание ја соопштил радосната вест на Пресвета Богородица дека ќе го роди Спасителот.

Според црковното предание, ангелските сили се поделени во девет чинови: серафими, херувими, престоли, господства, сили, власти, началства, архангели и ангели.

ПРАЗНИК КОЈ НОСИ ПОРАКА ЗА ВЕРА И ДОБРИНА

Архангеловден е празник кој во православните домови се одбележува со молитва, семејно собирање и почит кон светецот-заштитник. За многу семејства овој ден е и домашна слава.

Но, неговото значење е многу подлабоко од традицијата и празничната трпеза. Тој нè потсетува дека треба да се бориме против злото, да го чуваме мирот во себе, да им помагаме на оние на кои им е потребна помош и да не ја губиме надежта ниту во најтешките моменти.

Нека Архангел Михаил биде молитвен застапник за здравје, мир, љубов и благосостојба во секој дом.

Слични Објави