ПРИЛЕП, 21 септември – Во рамките на Европската недела на мобилност, која се одбележува од 16 до 22 септември, Општинскиот совет за безбедност на сообраќајот на патиштата (ОСБСП) – Прилеп упатува повик до граѓаните да се вклучат во иницијативата за промовирање на почисти, поздрави и побезбедни начини на движење.

Под мотото „Мобилност за сите“, годинава акцентот е ставен на алтернативните и еколошки начини на транспорт, со порака дека секое пешачење, возење велосипед или користење јавен превоз претставува чекор кон подобра животна средина и поуреден град.

Од ОСБСП – Прилеп упатуваат и конкретен повик до граѓаните: „Одлуката почнува од сите нас – денес до работа и училиште со велосипед: помалку автомобили, повеќе движење!“

Според организаторите, промената на секојдневните навики може да придонесе за намалување на загадувањето на воздухот и сообраќајниот метеж, но и за поттикнување поздрави животни навики кај граѓаните.

22 септември – Ден без автомобили

Кулминација на Европската недела на мобилност е 22 септември, Денот без автомобили, кога и Општина Прилеп се приклучува кон иницијативата која се одбележува во голем број европски градови.

Целта е граѓаните, барем за еден ден, да го остават автомобилот дома и да изберат пешачење, велосипед или јавен превоз.

Одбележувањето има за цел да придонесе кон:

• намалување на загадувањето на воздухот;
• намалување на сообраќајниот метеж;
• поттикнување здрави животни навики;
• создавање почиста, поздрава и попријатна животна средина.

Од ОСБСП – Прилеп истовремено потсетуваат дека сообраќајната култура и меѓусебното почитување се од особено значење за безбедноста на сите учесници во сообраќајот.

Улиците, тротоарите и јавниот простор треба да бидат безбедни и достапни за сите – децата, младите, возрасните, повозрасните лица и лицата со попреченост.

Пораката од иницијативата е дека малите промени во секојдневните навики можат да донесат значајни придобивки за целата заедница.

„На 22 септември, оставете го автомобилот дома, изберете велосипед, пешачење или јавен превоз и бидете дел од промената!“, апелираат од ОСБСП – Прилеп.

Европската недела на мобилност во Прилеп се одбележува со порака за почист град, побезбедни улици и поздрава иднина, со нагласок дека одговорноста за подобра мобилност и безбедност во сообраќајот започнува од секој поединец.