4-ти Април, Денот на тутунските работници!
Денот на тутунските работници е важен момент во историјата на работничките права во Македонија. Штрајкот организиран на 4 април 1938 година под водство на Борка Левата е значаен не само за работниците од Прилеп, туку и за целата работничка класа во земјата, бидејќи се поставени основи за синдикални права и борба за подобри услови на работа.
Тој штрајк, во кој се побарало зголемување на надниците, укинување на казнен режим и подобрување на работните услови, покажал како синдикалната солидарност и организираност може да доведе до резултати, иако штрајкот бил многу тежок и насилен.
Пред управата на монополот биле изнесени три барања и тоа: зголемување на надниците на сите работници за 20 проценти, укинување на режимот на казните и подобрување на условите на работа.
Во обидите на полицијата да ги спречи штрајкувачите да демонстрираат, низ градот дошло до судири во кои биле повредени тројца работници и еден жандарм, а 50 работници биле затворени. Штрајкот траел 7 дена, а управата на Монополот, гледајќи дека ако продолжи штрајкот, ќе претрпи големи штети, ги прифатила барањата на штрајкувачкиот одбор, и со тоа штрајкот завршил, а работниците се вратиле на работа.
Историјата на работничките движења, како овој штрајк, значи не само празник за работниците, туку и потсетник за важноста на борбата за права, како и на опасностите што често ги носи оваа борба.
