ОД ПРИЛЕП ДО 6.070 МЕТРИ – МАРИЈАНА ПОВТОРНО НА ХИМАЛАИТЕ

Новиот подвиг на искусната прилепчанк овојпат е проследен со силна хумана порака: „Овој врв не е за мене. Овој врв е за иднината. За светла иднина за сите деца.“

Прилепчанката Маријана Ѓорѓиевска повторно се искачи високо во Хималаите, продолжувајќи ја својата долгогодишна приказна со високите планини. На 13 септември, во 8 часот наутро по локално време, таа објави дека го достигнала врвот UT Kangri, висок 6.070 метри, во регионот Ладак во Индија.

Но, овојпат зад спортскиот предизвик стои и порака со посебна тежина.

„Овој врв не е за мене. Овој врв е за иднината. За светла иднина за сите деца. Овој пат – за децата во Индија“, порача Ѓорѓиевска по искачувањето.

За Маријана ова не е прва средба со височините над 6.000 метри. Таа и претходно има искачувано високи планински врвови, а во 2024 година беше дел од хималајска експедиција во Непал, кога го искачи Island Peak, висок 6.189 метри.

За искачувањето на Island Peak, нејзините подготовки траеле речиси една година и опфаќале редовно планинарење, велосипедизам, кондициони тренинзи, зајакнување на рацете и грбот, искачување на карпа и совладување на алпинистичка техника.

Ѓорѓиевска има планинарено на четири континенти и во 17 европски држави, а зад себе има бројни искачувања. Во 2019 година го искачила и Аконкагва во Аргентина, висок 6.962 метри, а во својата планинарска кариера има достигнато три од седумте највисоки врвови на континентите.

Покрај личните планинарски подвизи, таа е активна и во афирмацијата на жените во спортот. Преку здружението „Пелагона Прва“ работи на поттикнување на женското учество во планинарењето и спортските активности.

За Ѓорѓиевска, сепак, планината не е само место каде што се освојуваат височини.

„Јас не ги освојувам врвовите – туку тие мене. Јас само ги искачувам кога тоа ќе ми го дозволи планината“, има кажано таа.

Токму во тој дух е и нејзината најнова порака од Ладак. Искачувањето на 6.070 метри не го претставува само како личен успех, туку како симболична посвета на децата и иднината.

Од Прилеп до Хималаите, Маријана Ѓорѓиевска продолжува да ги поместува границите на сопствената издржливост – но и да испраќа пораки кои се поголеми од самиот врв.

Овојпат, нејзината порака од 6.070 метри е едноставна и силна: врвот е за иднината и за децата.