Кривогаштани го одбележа Денот на наставниците со шаховски турнир
Шаховски турнир во Кривогаштани по повод Светскиот ден на наставниците
Светскиот ден на наставниците денеска беше одбележан во Кривогаштани со шаховски турнир во ООУ „Манчу Матак“, организиран во соработка со Шаховскиот клуб „Прилеп“.
На турнирот учествуваа наставници, ученици, родители и граѓани, кои преку шаховската игра имаа можност да се дружат и да го одбележат денот посветен на наставничката професија.
На настанот присуствуваше и градоначалникот на Општина Кривогаштани, Игор Каравилоски, кој упати честитка до наставниците и ја истакна нивната значајна улога во образованието и воспитувањето на младите.
„Почитувани наставници, ви благодарам за трудот и трпението со кои секојдневно ги учите и воспитувате нашите деца. Ви посакувам добро здравје и уште многу генерации ученици со кои ќе се гордеете! Нека е честит Светскиот ден на наставниците!“, порача Каравилоски.
Организирањето на шаховскиот турнир претставува убав начин преку спортот, логиката и дружењето да се одбележи празникот на наставниците, но и да се поттикне интересот кај најмладите за шахот и заедничките активности.
Одбележувањето во Кривогаштани уште еднаш ја нагласи важноста на наставниците во создавањето знаење, вредности и идни генерации.
