Познатиот прилепчанец, академик и професор Жарко Башески ја претставува македонската современа уметност во Белград со својата самостојна изложба „Корпореалност“, која беше отворена на 2 октомври 2026 година во Музејот на современа уметност во Белград.

Изложбата ќе биде достапна за посетителите до 9 ноември 2026 година, претставувајќи значаен културен настан и уште една потврда за меѓународното значење на творештвото на еден од најистакнатите современи македонски скулптори.

Поставката е реализирана во соработка меѓу Музејот на современа уметност во Белград и Националната галерија на Република Северна Македонија, а кураторки на изложбата се Злата Вучетиќ и Маја Крстевска.

Преку своите препознатливи хиперреалистични скулптури, Башески го истражува човечкото тело како одраз на психолошките, општествените и егзистенцијалните предизвици на современиот човек. Неговите дела, изработени со извонредна прецизност и силен уметнички израз, ја прикажуваат човечката ранливост, внатрешните борби и притисоците на современото живеење.

Роден во Прилеп, Жарко Башески со своето творештво одамна ги надмина границите на Македонија. Неговото претставување на Венециското биенале во 2011 година е еден од значајните моменти во неговата богата уметничка кариера.

Изложбата „Корпореалност“ е уште една можност делото на Башески да допре до пошироката регионална публика и да ја афирмира македонската уметност на значајна културна сцена.

За Прилеп, неговиот успех е посебна гордост. Градот под Марковите кули продолжува да дава уметници чии дела оставаат трага и надвор од границите на нашата земја.

Изложбата „Корпореалност“ во Музејот на современа уметност во Белград е отворена од 2 октомври до 9 ноември 2026 година.