Прилепчаниецот Чатлески против Јањанин во Бор
Македонски боксер Матеј Чатлески го доби својот следен противник на меѓународната сцена. На 28 март, во Бор, Чатлески ќе се соочи со искусниот боксер од Босна и Херцеговина, Милош Јањанин.
Мечот, кој е официјално потврден од Balkan Boxing, ќе се одржи во четири рунди и претставува значаен тест за формата на македонскиот боксер. Чатлески, кој паралелно со спортската кариера студира на Факултет за електротехника и информациски технологии (ФЕИТ), постепено го гради својот пат во професионалниот бокс, а дуелот со Јањанин е важен чекор во тој развој.
Настанот во Бор се одржува под покровителство на Ненад Боровчанин и најавува богата боречка програма. Во главните борби на вечерта ќе настапат Алмир Мемиќ против Јаго Кизириа, како и Миљан Ѓорѓевиќ против Карлос Риверо, во мечеви предвидени на шест рунди.
Свои настапи ќе имаат и Марко Мариќ, Матија Радовиќ и Бењамин Потурак. Претходно најавените борби на Милош Јаничиќ и Јован Николиќ се откажани.
Целиот настан ќе биде пренесуван во живо на Arena Fight TV, што ќе им овозможи на љубителите на боксот да го следат настапот на Чатлески и да ја оценат неговата подготвеност во рингот.
Оваа боксерска вечер во Бор ветува квалитетни пресметки и силна конкуренција меѓу борците од регионот и пошироко.
