| |

„Прочкарска смеа за секого“ донесе радост и креативност во Кривогаштани

Hours

По повод празникот Прочка, Општина Кривогаштани организираше традиционален карневал под мотото „Прочкарска смеа за секого“, кој внесе радост, смеа и разиграност меѓу најмладите и бројните посетители во Кривогаштани.

Настанот беше вистинска прослава на детската фантазија и креативноста, исполнет со весела музика, шарени костими и многу насмевки. Во карневалската поворка учествуваа ученици од двете општински основни училишта – ООУ „Манчу Матак“ и ООУ „Јонче Смугрески“, како и дечињата од детските градинки „Весело штркче“ и „Јаготка“.

Со голема возбуда и ентузијазам, учениците продефилираа во најразлични маски – од традиционални ликови поврзани со македонската култура, до модерни и фантастични костими инспирирани од бајки, суперхерои и животинскиот свет. Посебно внимание привлекоа рачно изработените маски со шарени украси, текстилни детали и внимателно осмислени костими, кои сведочеа за вложениот труд и посветеноста на учениците и нивните наставници.

Карневалот, покрај забавниот карактер, имаше и силна порака за негување на традицијата на Прочка – ден на простување, помирување и нов почеток со чисто срце. Настанот уште еднаш покажа дека заедништвото, креативноста и радоста се вредности кои се негуваат меѓу младите генерации во општината.

Наградени маски

Жири-комисијата имаше тешка задача да ги избере најдобрите, а наградите беа доделени во следните категории:

Индивидуална маска:

  • 🥇 I место: Петар Ликоски – „Цар Самоил“
  • 🥈 II место: Анабела Грашкоска – „Chat GPT“
  • 🥉 III место: Андреј Крстески – „Дедо“

Групна маска:

  • 🥇 I место: ученици од VII и VIII одделение од Кривогаштани – „Жена – НЕ“
  • 🥈 II место: IV одделение од Кривогаштани – „Витези и принцези“
  • 🥉 III место: IV одделение од Обршани – „Македонија во срцето“

Дополнително, пофалби добија:

  • дечињата од двете градинки,
  • маската „Сончеви облачиња“ (II одделение, Кривогаштани) и
  • маската „Каменковци“ (I одделение, Обршани).

Од Општина Кривогаштани информираат дека за сите наградени и пофалени ученици ќе бидат обезбедени пригодни награди, како признание за нивната креативност и учество.

Карневалот остави убави спомени и уште еднаш ја потврди живата традиција на Прочка во Кривогаштани, со надеж дека оваа манифестација ќе продолжи и во иднина со уште поголем ентузијазам и масовност.

Слични Објави