Ново зголемување на цените на цигарите – постепено усогласување со европските акцизи

Од 1 септември цената на дел од цигарите во Македонија е зголемена за 10 денари по кутија. Први поскапеа брендови на Импириал Тобако ТКС – Скопје, а во наредниот период се очекува зголемувањето да ги опфати и другите производители и увозници.

Зголемувањето е дел од континуираниот процес на усогласување на акцизната политика со европските стандарди, предвиден со Законот за акцизи. До 1 јули 2023 година акцизата се зголемуваше за 0,20 денари по парче секоја година, додека со измените на законот од јануари 2024 година, стапките на минималната и специфичната акциза растат за 0,23 денари по парче секој јануари, сè до 2030 година.

Македонија е меѓу земјите со највисок процент на пушачи во Европа – според Светската здравствена организација, околу 45% од возрасното население активно користи тутун. За споредба, европскиот просек за 2025 година се очекува да изнесува 15,4%.

Последиците од пушењето се сериозни, годишно околу 4.000 граѓани умираат од болести предизвикани од тутун. Властите очекуваат дека постепеното зголемување на цените ќе мотивира дел од пушачите да се откажат, со што ќе се подобри јавното здравје.

Зголемувањето на цените не е само финансиска мерка, туку дел од поширока стратегија за заштита на населението и усогласување со европските регулативи.