Одбележан Денот на македонската азбука и јазик во ООУ „Климент Охридски“ – Прилеп

Денеска, учениците од Основното училиште „Климент Охридски“ во Прилеп со богата и разноврсна програма го одбележаа Денот на македонската азбука и јазик, посветувајќи внимание на важноста на овој историски момент за македонскиот народ.

Директорката на училиштето, Андриана Ристеска, во своето обраќање истакна значењето на озаконувањето на македонската азбука и јазик како не само културно, туку и национално достижение. Таа потсети на важноста на зачувувањето и промовирањето на македонскиот јазик како основа на идентитетот на народот.

Настанот продолжи со поздравен говор на м-р Маја Камшикоска, библиотекар и водител на празничната програма, која во соработка со учениците ја подготви и реализираше целокупната свеченост. Во програмата учествуваа учениците кои со песни, поезија и драмски изведби ја истакнаа убавината и богатството на македонскиот јазик.

„Денешниот ден е важен за нас сите, бидејќи го славиме нашиот јазик и азбука кои се срцето на нашата култура и историја“, изјави Камшикоска, додека учесниците уживаа во атмосферата на празничната прослава.

Денот на македонската азбука и јазик не само што е повод за прослава, туку и потсетник за важноста на зачувувањето на ова културно богатство за идните генерации.

Честит празник на сите!