Од полноќ повисоки цени на горивата
Регулаторната комисија за енергетика (РКЕ) донесе одлука за зголемување на малопродажните цени на нафтените деривати, кои во просек ќе бидат повисоки за 3,59 проценти во однос на претходната одлука.
Новите цени стапуваат во сила од 14 јули, во 00:01 часот.
Најголемо зголемување има кај дизелот. Цената на ЕУРОДИЗЕЛ БС (Д-Е V) се зголемува за 5,5 денари по литар и од полноќ ќе изнесува 88 денари за литар.
Бензините ЕУРОСУПЕР БС-95 и ЕУРОСУПЕР БС-98 поскапуваат за 1,5 денар по литар. Согласно новата одлука, цената на ЕУРОСУПЕР БС-95 ќе изнесува 87 денари за литар, додека ЕУРОСУПЕР БС-98 ќе се продава по 89 денари за литар.
Повисока ќе биде и цената на екстра лесното масло за домаќинство (ЕЛ-1), кое поскапува за 4,5 денари по литар и ќе чини 86 денари за литар.
РКЕ донесе одлука и за зголемување на цената на мазутот М-1 НС за 0,938 денари по килограм, со што новата цена ќе изнесува 42,168 денари за килограм.
Од Регулаторната комисија за енергетика информираат дека корекцијата на цените е резултат на растот на референтните цени на светските пазари, при што најизразено поскапување е забележано кај дизел-горивото, како и поради промените на курсот на денарот во однос на американскиот долар.
