Прилеп на мапата на брзата железница – План за поврзување до 2040 година

Прилеп дел од планот за брза железница – До Скопје за околу еден час

Прилеп е предвиден како важна точка во идната брза железничка врска меѓу Скопје и Битола, согласно Нацрт-просторниот план на Македонија до 2040 година.

Битола би можела да се поврзе со железничка линија со двата аеродрома во државата, во Скопје и во Охрид. Ова е предвидено во Нацрт-просторниот план на Македонија до 2040 година, кој беше презентиран во Битола, со посебен осврт на Пелагонискиот Регион.

Според професорот Зоран Каракутовски од Градежниот факултет во Скопје, целта е Битола, Струмица и Охрид да се поврзат со главниот град со железница за околу 90 минути.

За таа цел е предвидена изградба на брза пруга Скопје – Битола, која би минувала преку Градско, со нова траса кон Росоман и Раец и тунел под Плетвар, со што до Прилеп би се стигнувало за околу еден час.

Од Прилеп до Битола се планира реконструкција и електрификација на постојната пруга, со брзина на возовите од 120 до 149 километри на час. Со ваквото решение, патувањето од Битола до скопскиот аеродром би траело околу 80 минути.

Во подалечна перспектива е предвидено и железничко поврзување на Битола со охридскиот аеродром преку пругата Битола – Ресен.

Инаку, патната инфраструктура и понатаму претставува предизвик за регионот. Не е довршено автопатското решение кон Прилеп, а за поминување на 45-те километри меѓу Прилеп и Битола понекогаш е потребен и повеќе од еден час.

Станува збор за плански предвидувања до 2040 година, чија реализација ќе зависи од финансирањето и изградбата на потребната инфраструктура.