Меѓународниот спелеолошки камп во Штавица го насочи вниманието кон подземното природно богатство на Прилепско и Мариово

Прилеп и прилепскиот регион се домаќини на еден од значајните меѓународни собири посветени на спелеологијата. Над 150 спелеолози, истражувачи и љубители на подземниот свет од околу 15 земји учествуваат на 18. Балкански спелеолошки камп – BSC 2026, кој деновиве се одржува во Штавица.

Во рамките на кампот се предвидени истражувања на шест пештери и пропасти во Мариовско и кај Македонски Брод. Според организаторите, целта е преку теренските истражувања да се дојде до нови сознанија за подземниот свет, но и да се придонесе за развојот на спелеологијата и авантуристичкиот туризам.

„Кај нас пештерите се 40 проценти истражени и се надеваме дека со врвните спелеолози, учесници на овој камп, ќе се дојде до нови сознанија, зашто има уште неоткриени канали во пештерите и пропастите“, вели Дарко Неданоски, претседател на Спелеолошката федерација на Македонија.

За Прилеп, ваков меѓународен настан има значење и надвор од самата спелеологија. Со присуството на учесници од повеќе европски и балкански земји, регионот добива можност пред меѓународната јавност да ги претстави природните локалитети, Мариово, планинските предели, пештерите, но и културното наследство и традицијата.

Токму авантуристичкиот и природниот туризам се сегменти во кои прилепскиот регион има простор за дополнителна туристичка афирмација. Спелеолошките истражувања, планинарењето, карпите и другите природни атракции можат да бидат дел од поширока туристичка понуда која не се ограничува само на традиционалните туристички содржини.

Прилепскиот градоначалник Дејан Проданоски на отворањето на кампот посочи дека регионот има природни потенцијали кои сè уште не се доволно истражени и искористени во туристичка смисла.

„Прилепскиот регион, Мариово, а и околината, имаат што да понудат кога се во прашање природата и нејзините креации. Уште многу тајни се кријат кои се надевам на ваков начин се откриваат и ги зголемуваат туристичките потенцијали на регионот“, истакна Проданоски.

Учесниците на BSC 2026, освен во истражувачките активности, имаат можност да го запознаат и локалниот начин на живот, културата и традицијата. Со тоа, кампот станува и своевидна промоција на Прилеп и околината пред посетители од странство.

Дека подземното природно богатство може да биде дел од туристичката приказна на регионот покажува и самиот интерес за овогодишниот камп. На едно место се среќаваат науката, истражувањето, авантурата и туризмот – четири сегменти кои можат да придонесат за поголема препознатливост на Прилеп како дестинација за активен и авантуристички туризам.

BSC 2026 затоа не е само собир на спелеолози. За Прилеп и регионот, тој е можност природното богатство под земја да стане видлив дел од туристичката понуда и регионот да биде препознаен и од посетители кои бараат поинакво, активно и истражувачко туристичко искуство.