Попристапен пат до манастирот „Успение на Пресвета Богородица“ Обршани

Општина Кривогаштани започна со проект за подобрување на инфраструктурата во регионот, кој ќе ги олесни условите за пристап до манастирот „Успение на Пресвета Богородица“, сместен во село Обршани. Како дел од проектот, започнати се подготовките за асфалтирање на патот кој води кон ова свето место.

Патот ќе биде изграден со вкупна должина од 267 метри и ширина од 3 метри, со вклучени банкини од пола метар по секоја страна. Овој инфраструктурен проект има за цел да го направи манастирот попристапен за посетителите и верниците, како и да ја зголеми безбедноста на патот.

„Целта е да го направиме ова свето место попристапно за сите, без оглед на годишното време или временските услови. Со новиот пат, манастирот ќе стане уште поголем центар за верски туризам и духовно збогатување“, изјави претставник од општината.

„Да го направиме ова наше светилиште и збирно место попристапно и подостапно за сите“ напиша градоначалникот на општина Кривогаштани, Николче Мискоски.

Ова асфалтирање претставува еден од многуте проекти кои се реализираат во рамките на напорите за модернизација на инфраструктурата во Општина Кривогаштани.