Дебреште денеска беше погодено од силно невреме, оставајќи ги земјоделците во неизвесност околу последиците врз годинешниот род.

Силно невреме проследено со обилен дожд и крупен град попладнево го зафати селото Дебреште, при што беа погодени земјоделските површини во атарот на селото.

Најголема загриженост кај земјоделците предизвикува состојбата со тутунскиот род, кој во овој период се наоѓа во чувствителна фаза од развојот. Крупниот град за кратко време ги покри земјоделските површини, а на дел од насадите се забележани оштетени и искршени листови и стебла.

Фотографиите од теренот покажуваат дека на одредени места градот натрупал значителна количина на земја и вегетација, додека насадите се целосно натопени од поројниот дожд.

За земјоделците од Дебреште, ваквото невреме може да биде сериозен удар, особено имајќи предвид дека тутунот е еден од главните извори на егзистенција за голем број земјоделски семејства во селото.

Сепак, точниот обем на штетите засега не може да се утврди. Земјоделците ќе можат да направат посериозна проценка откако целосно ќе се смири невремето и ќе се изврши увид на сите погодени парцели.

Се очекува во наредниот период да стане појасно колкав дел од тутунскиот род е оштетен и дали ќе биде потребно институционално проценување на штетите.