(видео) Прес-конференција на директорот Нешкоски: Платите исплатени, проблемите со финансирањето се системски
Директорот на Јавното претпријатие за просторно и урбанистичко планирање (ЈП за ПУП) Прилеп, Бранко Нешкоски, денеска одржа прес-конференција по повод штрајкот на дел од вработените во Градски превоз Прилеп.
– „Сите плати и додатоци кон платата – неделни часови, придонеси и додатоци за работни денови – се исплатени заклучно со 21 август,“ истакна Нешкоски, додавајќи дека без интервенцијата на локалната самоуправа, проблемите би биле многу посериозни.
Тој објасни дека главниот финансиски товар произлегува од недоволните државни блок-дотации за средните училишта, кои не ги покриваат реалните трошоци за бесплатниот ученички превоз. Разликата ја покрива Општина Прилеп од сопствен буџет, со поддршка на Советот на Општината.
„Со ребалансот обезбедивме зголемени субвенции. Мерката за бесплатен превоз на пензионери со минимална пензија значително го стабилизираше работењето на јавното претпријатие, кое беше пред финансиски колапс,“ нагласи директорот.
Барањата на работниците
Нешкоски потврди дека неодамна имал состанок со синдикатот, при што работниците ги доставиле своите барања:
- редовна исплата на плата до 15-ти во месецот,
- внесување на сите додатоци во бруто-платата,
- измена и усогласување на колективниот договор со Законот за минимална плата.
„Измената на колективниот договор веќе е во драфт-верзија и очекувам во текот на септември ова прашање да биде решено,“ рече директорот.
Финансиски столбови и долгови на училиштата
ЈП за ПУП функционира врз три финансиски столба – јавни паркиралишта, одделението за проектирање и планирање и јавниот градски превоз, кој е најголем трошковен сегмент. Долгот на средните училишта кон претпријатието, кој изнесуваше околу 6–7 милиони денари, речиси целосно е сервисиран.
Донираните комбиња за руралните средини
Нешкоски најави дека од 1 септември ќе бидат пуштени во употреба пет стари донирани комбиња, кои ќе сообраќаат кон руралните населени места: Канатларци, Ерековци, Подмол, Тополчани, Чепигово, како и Селце, Штавица и Волково.
„И за едно дете вреди да се пушти линија, а уште повеќе за жителите на тие региони,“ додаде тој.
На крај, директорот порача дека проблемите се реални и системски, но се решаваат со постојана координација помеѓу претпријатието, општината и синдикатот. Очекувањата се дека со измена на методологијата за блок-дотации од 2026 година ќе се надмине најголемиот дел од финансиските тешкотии.
