(видео) Фестивал на пиперката 2026 – Кривогаштани
По едногодишна пауза, синоќа во Кривогаштани повторно се одржа Фестивалот на пиперката, манифестација посветена на еден од најзначајните земјоделски производи и препознатливите обележја на овој регион.
Четвртото издание на фестивалот ги собра жителите на Кривогаштани, земјоделци, производители и гости од околните места. На штандовите беа претставени пиперки, традиционални производи и домашни специјалитети, со што посетителите имаа можност да се запознаат со локалното производство и традиција.
Фестивалската програма започна со содржини за најмладите, преку програмата „Магијата на пиперките“, по што следуваше музичкиот дел од вечерта.
Пред публиката настапија Пајак, Мелос Бенд, Татјана Стефановска, Кико и Тикса Бенд, а програмата заврши со настап на DJ Tammy.
Фестивалот на пиперката има за цел да ја промовира земјоделската традиција на Кривогаштани, локалните производи и потенцијалите на општината, но истовремено да понуди и културна и забавна програма за посетителите.
По паузата од една година, враќањето на фестивалот повторно го стави Кривогаштани во центарот на вниманието на љубителите на традиционалните производи и локалните манифестации.
А пиперката, се чини, повторно си дојде на своето.
Само што овојпат не заврши во тегла, туку на фестивалска сцена.
