Ново комунално возило преку Јапонски грант

Општина Могила склучи грант договор со Амбасадата на Јапонија вреден 68.194 евра за ново возило за комунален отпад

Општина Могила денес склучи значаен грант договор со Амбасадата на Јапонија, кој ќе помогне во обезбедувањето на ново возило за собирање на комунален отпад. Вредноста на договорот изнесува 68.194 евра, а потпишан е помеѓу градоначалникот на општина Могила, г-н Драганчо Саботковски, и Н.Е. Амбасадор на Јапонија, г-н Оцука Казуја.

Договорот беше официјално потпишан во просториите на Амбасадата на Јапонија во Скопје. Оваа донација е од исклучителна важност за Општина Могила, како и за подобрување на условите за живот на нејзините жители. Се очекува новото возило да има значително влијание врз заштитата на животната средина во регионот, со тоа што ќе овозможи поефикасно и поеколошко собирање на комуналниот отпад.

„Оваа донација ќе помогне во значителен напредок на нашата општина во областа на управување со отпадот и ќе го подигне стандарнот на живот на нашите жители“, изјави градоначалникот Саботковски. „Возилото кое ќе го добиеме ќе биде од големо значење за подобрување на чистотата и екологијата, што е еден од нашите приоритети.“

Амбасадорот на Јапонија, г-н Оцука, изрази задоволство од оваа соработка и нагласи дека Јапонија е посветена на поддршка на општини и заедници во Македонија кои се залагаат за подобрување на животната средина и инфраструктурата.

Ново возило за собирање отпад ќе придонесе не само за поефикасно управување со отпадот, туку и за подобрување на хигиенските услови и општата чистота во Општина Могила, што ќе има директно позитивно влијание на квалитетот на живот во општината.

Овој проект е дел од пошироките напори на Амбасадата на Јапонија да ги поддржи локалните заедници во Македонија и да ја унапреди нивната инфраструктура и животната средина.