Цените во Македонија се зголемија по укинувањето на мерката за замрзнување на маржите
Од 30 април, кога заврши владината мерка за замрзнување на трговските маржи за основни производи, цените на многу стоки во Македонија доживеаја драматичен пораст. Потрошувачите се соочуваат со поскапувања, особено во секторите на свежото овошје, хигиенските производи и основните прехранбени артикли.
Во одредени супермаркети, цената на килограм цреши достигна 1359 денари, додека цитроните се продаваат за 130 денари. Јаболката и бананите, основни артикли во секое домаќинство, сега надминуваат 100 денари по килограм. Покрај тоа, растот на цените не се ограничува само на сезонските производи, туку и на основни хигиенски и прехранбени артикли, како што се тоалетната хартија, пастата за заби, млекото, маслото, јајцата и сирењето.
Примери на поскапувањ, чоколадо од 80 грама се продава за 120 денари, а пакување кафе од 180 грама, кое пред само една недела чинеше 119 денари, сега достигнува и до 160 денари. Според изјави од дистрибутери, новите ценовници вклучуваат зголемувања на цените до 50% во однос на претходните фактури.
Бизнис-секторот објаснува дека трговците не се носители на ценовниот удар, туку дека тој доаѓа од страна на производителите и увозниците, кои ги подигнале цените на своите производи. Истовремено, преминувањето на потрошувачите од домашниот на странскиот пазар заради пониски цени станува се почеста појава. Според анализите, Македонија е една од последните земји во Европа каде што инфлацијата продолжува да расте, што ја прави уште покритична економската ситуација.
Со цел да се спречи понатамошното дестабилизирање на ценовниот систем, Владата претходно најави дека ќе следи внимателно состојбата по завршувањето на мерката за замрзнување на цените. Сепак, реалноста на теренот ги надминува очекувањата, а инфлацискиот притисок повторно добива на замав, додека економската неизвесност го поткопува животниот стандард на граѓаните.
Поради оваа ситуација, отворено стои прашањето дали Владата ќе интервенира со нови мерки или пазарот ќе се коригира сам, но со висок ризик за поголем удар врз домашната економија.
