80 години од раѓањето на Џумерко – прилепската легенда на македонското глумиште

.

На денешен ден, пред точно 80 години, во Прилеп, во семејството на Киро и Марија Спиркоски, е роден Благоја Спиркоски – Џумерко, еден од најзначајните, најпочитуваните и најсаканите актери во македонската културна историја.

Џумерко зад себе остави богат и незаборавен траг во театарот, телевизијата и филмот, а посебно останува запаметен по своите улоги во култниот серијал „Македонски народни приказни“, со кој трајно се вгради во колективната меморија на македонскиот народ.

Во 1986 година, екипата на „Македонските народни приказни“ гостуваше во неговиот роден Прилеп, каде што беа реализирани две епизоди: „Крале Марко и Црна Арапина“ и „Крале Марко и Дука Хајдутин“. Во двете, Џумерко маестрално го толкуваше ликот на Крале Марко, снимајќи на автентичните локации кај Марковите Кули – простор што со својата историска тежина и природна драматичност совршено се совпадна со неговата сценска појава.

Фотографијата што ја објавуваме е направена за време на снимањето на „Крале Марко и Црна Арапина“ и го прикажува Џумерко заедно со Ѓорѓи Колозов – двајца големи уметници, препознатливи по својот силен народен израз и автентичност.

Тие не беа само актери – тие беа луѓе кои го живееја народниот дух, што им донесе огромна љубов и почит кај публиката низ цела Македонија.

Нивното дело останува како трајна вредност во македонската култура.

Вечна слава.