Од утре започнува Богородичниот пост

Од утре, 14 август, за православните верници започнува Богородичниот пост, кој ќе трае две седмици – до празникот Успение на Пресвета Богородица (28 август). Овој пост е посветен на духовна и телесна подготовка пред големиот празник, кога Црквата го слави преминувањето на Божјата Мајка од овој живот во вечниот.

Во текот на постот верниците се повикани на воздржување од мрсна храна – месо, млечни производи и јајца, како и од сите производи кои содржат животински масти. Масло и вино се дозволуваат само во одредени денови, а риба е дозволена единствено на празникот Преображение Христово (19 август).

Богородичниот пост има и силен духовен аспект – не е само воздржување од храна, туку време за молитва, покајание и милосрдие. Според учењето на Црквата, вистинскиот пост е соединет со добри дела, простување, внатрешно смирување и посветување на Бога.

Постот завршува на 28 август, кога се празнува Успение на Пресвета Богородица – празник кој народот го нарекува и Голема Богородица, еден од најпочитуваните денови во православниот календар.