По 14 години, Прилеп повторно добива нови амбулантни возила преку владина набавка.

Прилеп ќе добие три нови амбулантни возила за потребите на Итната медицинска помош, во рамки на набавката на вкупно 100 возила наменети за здравствените установи низ Македонија.

Со оваа набавка, по пауза од 14 години, повторно се обновува возниот парк на Итната медицинска помош во Прилеп преку владина инвестиција. Последната ваква набавка за градот била реализирана во 2012 година.

Новите амбулантни возила треба да придонесат за подобрување на условите за работа на медицинските екипи и за поефикасно обезбедување итна медицинска помош за граѓаните.

Нивното значење е особено големо ако се има предвид дека Прилеп, покрај градското население, ги опслужува и жителите на околните населени места. Со дополнителните возила се очекува да се олесни секојдневното функционирање на службата, како и транспортот на пациентите на кои им е потребна итна медицинска интервенција.

Обновувањето на возниот парк претставува важен чекор кон подобрување на условите за работа на здравствените работници и унапредување на достапноста на итната медицинска помош за граѓаните на Прилеп и околината.